Azərbaycan Dövlət Aqrar Universitetində (ADAU) Gəncə Şəhər İcra Hakimiyyəti, Gəncə Şəhər Ağsaqqallar Şurasının təşkilatçılığı ilə "Konstitusiya və Suverenlik İli" çərçivəsində "Azərbaycan Respublikası Prezidenti İlham Əliyevin ABŞ-a və Çin Xalq Respublikasına işgüzar səfəri çərçivəsində ABŞ, Çin-Azərbaycan münasibətləri bir çox sahələrin dinamik inkişafına səmərəli töhfə verəcəkdir" mövzusuna həsr olunmuş dəyirmi masa keçirilib.

Tədbirdə Gəncə Şəhər İcra Hakimiyyəti başçısı Aparatının Şəhərin mədəni irsinin qorunması şöbəsinin müdiri Yadigar Bədəlov, Gəncə Şəhər Ağsaqqallar şurasının sədri, professor Nurəddin Məmmədov, Qərbi Azərbaycan İcmasının Gəncə şəhər nümayəndəliyi, Gəncə Ağsaqqallar Şurasının üzvləri, ali məktəblərin, kolleclərin, müəssisə-təşkilatların rəhbərləri və ziyalılar iştirak ediblər.

Tədbirdə əvvəlcə Ümummilli Lider Heydər Əliyevin və şəhidlərin əziz xatirəsi bir dəqiqəlik sükutla yad edilib.

Professor Nurəddin Məmmədov iştirakçıları salamladıqdan sonra, mövzu ətrafında məlumat verib. Çıxış edən Yadigar Bədəlov, ADAU-nun Tədris işləri üzrə prorektoru Əhməd Məlikov və İctimai fənlər kafedrasının müdiri, dosent Elgün Aslanov mövzu ətrafında geniş məruzə ilə məlumat veriblər.

Daha sonra çıxış edənlər GDU-nun professoru Həsənbala Sadıqov, Gəncə Tibb Kollecinin direktoru, Əməkdar həkim Mehman Rzayev, Gəncə Ağsaqqallar Şurası sədrinin birinci müavini Zabit Xəlilov, ATU-nun dosenti Hüseyn Budaqov, QAİ İdarə heyətinin üzvü, dosent Bayram Apoyev və başqaları tam əminliklə birmənalı olaraq bildiriblər ki, bu möhtəşəm səfərlər ABŞ, Çin-Azərbaycan iqtisadi ticarət əlaqələrinin gələcək inkişafına da səmərəli töhfə verəcək.