Gəncə Şəhər İcra Hakimiyyətinin dəstəyi, Türk Əməkdaşlıq və Koordinasiya Agentliyinin (TİKA) Bakı Proqram Koordinatorluğu və Türkiyənin Gəncə şəhərindəki Baş Konsulluğunun təşkilatçılığı ilə şəhid ailələri üçün “Könül süfrəmiz” adlı iftar süfrəsi təşkil olunub.

Tədbirdə Gəncə Şəhər İcra Hakimiyyətinin başçısı Niyazi Bayramov, Türk Əməkdaşlıq və Koordinasiya Agentliyinin (TİKA) Bakı Proqram Koordinatorluğunun direktor müavini Kürşat Özdemir, Türkiyənin Gəncədəki Baş konsulu Recep Öztop, Gürcüstanın Gəncədəki Baş konsulu Kaxaber Abdaladze, YAP Gəncə şəhər təşkilatının sədri Bayram Aslanov, QMİ Qazılar Şurasının üzvü Hacı Tahir Abbasov, idarə, müəssisə və təşkilat rəhbərləri, eləcə də şəhid ailələri iştirak ediblər.

Çıxış edən natiqlər Ramazan ayının mənəvi dəyərlərindən, şəhid ailələrinə göstərilən diqqət və qayğıdan söz açaraq, belə tədbirlərin həmrəylik və birlik rəmzi olduğunu bildiriblər. Qeyd olunub ki, şəhidlərimizin xatirəsi hər zaman uca tutulur və onların ailələri dövlətin daim diqqət mərkəzindədir.

Daha sonra din xadimi tərəfindən dualar oxunub və iftar süfrəsi açılıb.

Sonda xatirə şəkli çəkdirilib.