Gəncə şəhər Şəhidlər Xiyabanında Birinci Qarabağ müharibəsi zamanı itkin düşmüş hesab edilən hərbçi Əsgərov Nofəl Cahangir oğlunun dəfn mərasimi keçirilib.

Mərasimdə Gəncə Şəhər İcra Hakimiyyətinin başçısı Niyazi Bayramov, Türkiyənin Gəncədəki Baş konsulu Recep Öztop, Gürcüstanın Gəncədəki Baş konsulu Kaxaber Abdaladze, YAP Gəncə şəhər təşkilatının sədri Bayram Aslanov, ADAU-nun rektoru Zəfər Qurbanov, QMİ Qazılar Şurasının üzvü Hacı Tahir Abbasov, hüquq-mühafizə orqanlarının rəhbərləri, Gəncə Şəhər İcra Hakimiyyəti başçısı Aparatının məsul əməkdaşları, bələdiyyə sədrləri, idarə, müəssisə və təşkilat rəhbərləri, müharibə iştirakçıları, şəhid ailələri və ictimaiyyət nümayəndələri iştirak ediblər.

Daha sonra rəsmilər mərhumun ailəsini ziyarət edərək yas mərasimində iştirak ediblər. Niyazi Bayramov şəhidin ailə üzvləri ilə görüşərək onlara dərin hüznlə başsağlığı verib, Allahdan səbr diləyib.

Qeyd edək ki, Əsgərov Nofəl Cahangir oğlu 10 sentyabr 1965-ci ildə Tərtər rayonunun Borsunlu kəndində anadan olub. Daha sonra ailəsi ilə birlikdə Gəncə şəhərinə köçüb. 15 iyun 1992-ci ildə Sırxavənd döyüşləri zamanı itkin düşüb.